तपस्या आणि इतर कथा

जीवनाच्या प्रवासात अनेक चढउतार आले, यश-अपयशाचे असंख्य प्रसंग अनुभवायला मिळाले. प्रत्येक वेळी संकटांनी घेरले, आत्मविश्वास डळमळला, तरी पुन्हा उभे राहण्याची शक्ती मिळाली ती दादांच्या मूक आशीर्वादातूनच. त्यांच्या विश्वासाने, प्रेरणेने आणि अदृश्य पाठबळानेच प्रत्येक आव्हानाला सामोरे जाण्याची उमेद मिळत राहिली.
लेखनाची आवड आणि शब्दांशी जुळलेले नाते हेही त्यांच्याकडून मिळालेले एक अमूल्य दान आहे. ते अत्यंत सुंदर आणि प्रभावी लेखन करीत असत. व्यवसायाने डॉक्टर असूनही साहित्य, वाङ्मय आणि विचारविश्व यांचा त्यांचा व्यासंग विलक्षण व्यापक होता. ज्ञानाची खोली, भाषेवरील प्रभुत्व आणि साहित्याबद्दलची त्यांची तळमळ हे सर्वच प्रेरणादायी होते.
त्यांनी गाठलेली उंची आणि निर्माण केलेला वैचारिक ठेवा माझ्यासाठी सदैव आदर्श राहील. त्या पातळीपर्यंत पोहोचणे कदाचित शक्य होणार नाही, याची जाणीव असली तरी त्यांच्या संस्कारांचा आणि वारशाचा अंश लाभल्याचे भाग्य लाभले आहे.
आज ते प्रत्यक्ष आपल्या सोबत नाहीत, पण त्यांची स्मृती, विचार आणि आशीर्वाद प्रत्येक क्षणी सोबत असल्याची जाणीव मनाला बळ देते. त्यांच्या प्रेरणेचा प्रकाशच पुढील वाटचालीचा खरा आधार आहे.